(بۆرۆژهه‌لات)ـ ناوه‌ندی‌ هه‌وال: كه‌مایه‌تی‌ كومیته‌ی‌ مه‌ركه‌زی‌ كۆمه‌له‌ له‌ بلاوكراوه‌یه‌ك دا كه‌ به‌ (بۆرۆژهه‌لات) گه‌یشتووه‌ هۆكاره‌كانی‌ خۆیان بۆ به‌شداری‌ نه‌كردن له‌ كونگره‌ی‌ كۆمه‌له‌ ده‌خه‌نه‌ روو. ئه‌م راگه‌یه‌ندراوه‌ كه‌ سه‌ره‌تا له‌ نێو خۆی‌ كۆمه‌له‌ بلاوبۆته‌وه‌، ئێستا بۆ بیرورای‌ گشتی‌ دراوه‌ به‌ (بۆرۆژهه‌لات) كه‌ لێره‌دا وه‌ك خوی‌ بلاو‌ ده‌كرێته‌وه‌:



بۆ به‌شداری‌ له‌ كۆنگره‌ی‌ 12دا ناكه‌ین؟

زیاتر له‌ ساڵێكه‌ كێشه‌ ناوخۆییه‌كان، ژیانی‌ سیاسی‌ و ته‌شكیلاتیی‌ كۆمه‌ڵه‌ی‌ خستۆته‌ ژێر كاریگه‌ریه‌وه‌. ئه‌م كێشانه‌ له‌سه‌ر به‌ستێنی‌ قه‌یرانێكی‌ سیاسی‌_ته‌شكیلاتیی‌ راسته‌قینه‌ سه‌ری‌ هه‌ڵدا كه‌ له‌ ساڵانێك له‌وه‌ پێشه‌وه‌ و به‌تایبه‌ت دوای‌ كۆنگره‌ی‌ ده‌یه‌می‌ كۆمه‌ڵه‌ به‌ره‌و ئێستا ئاشكراتر كۆمه‌ڵه‌ی‌ له‌ ته‌نگژه‌ ناوه‌. كێشه‌كانی‌ ناو رێبه‌رایه‌تی‌ كه‌ خۆی‌ ره‌نگدانه‌وه‌ی‌ وه‌ڵامی‌ جۆراوجۆر به‌م قه‌یران و ئاڵۆزیه‌یه‌، له‌ ساڵی‌ رابردووه‌وه‌ زیاتر قووڵ‌ بووه‌ته‌وه‌ و له‌ سه‌رده‌می‌ كۆنگره‌ی‌ 11 له‌ پاییزی‌ رابردوودا، هه‌موو كۆمه‌ڵه‌ی‌ گرته‌وه‌.
كۆنگره‌ی‌ 11ی‌ كۆمه‌ڵه‌ كه‌ به‌ بنبه‌ست گه‌یشتبوو، به‌ به‌ڵێنی‌ سكرتێری‌ گشتیی‌ كۆمه‌ڵه‌ و به‌ پێكهێنانی‌ فه‌زایه‌كی‌ زۆر عاتیفی‌ له‌ هه‌وڵ‌ بۆ یه‌كڕیزیی‌ كۆمه‌ڵه‌ و ده‌نگی‌ متمانه‌ی‌ كۆنگره‌ به‌م فه‌زا ده‌ستكرده‌، كۆتایی‌ پێهات. به‌ڵام له‌ یه‌كه‌مین پلۆنۆمی‌ كۆمیته‌ی‌ ناوه‌ندیدا له‌ ئاراسته‌یه‌كی‌ پێچه‌وانه‌ی‌ ئه‌م به‌ڵێن و ده‌نگی‌ متمانه‌یه‌ی‌ كۆنگره‌، سكرتێر و ده‌فته‌ری‌ سیاسی‌ به‌ زۆرینه‌ بوونیان له‌ كۆمیته‌ی‌ ناوه‌ندی‌، له‌ پێناو سڕینه‌وه‌ و وه‌لانانی‌ نه‌ك زۆر شاراوه‌شدا هه‌وڵیاندا. له‌ ده‌فته‌ری‌ سیاسیه‌وه‌ ده‌ستیان پێكرد، به‌ ئاشكرا پشتیان له‌ به‌ڵێنی‌ كۆنگره‌ كرد و گوێیان به‌ ناره‌ِزاییه‌ ته‌شكیلاتیه‌كان نه‌دا و ته‌نانه‌ت له‌ پۆسته‌كانی‌ خواره‌وه‌ی‌ ته‌شكیلاتیش چاوپۆشیان نه‌كرد، كه‌ به‌های‌ ناوخۆیشیان هێنده‌ نه‌بوو. مێژووی‌ خه‌باتی‌ ئه‌ندامان و كادره‌كان و توانا و لێوه‌شاوه‌ییان كه‌وته‌ په‌ڕاوێز و پێوه‌ر و ته‌نیا پێوه‌ری‌ سه‌ره‌كی‌ گوێ‌ له‌ مست بوونی‌ باڵێك له‌ رێبه‌رایه‌تی‌ بوون و به‌كورتی‌ خۆیی‌ و بێگانه‌یان ره‌سمیه‌ت پێدا.
رووداوه‌ ناوخۆییه‌كانی‌ مانگه‌كانی‌ رابردوو تا راده‌یه‌ك بۆ هه‌موان ئاشنایه‌. هه‌وڵه‌كانی‌ ئێمه‌ بۆ بردنی‌ ئه‌و ناكۆكیانه‌ به‌ره‌و ره‌هه‌ندێكی‌ سیاسی‌ و پڕ دیالۆگ و سه‌رقاڵ‌بوون به‌ مه‌سه‌له‌ واقیعیه‌كانی‌ بزووتنه‌وه‌، له‌گه‌ڵ‌ ته‌وژمی‌ بێ‌وێنه‌ترین تۆمه‌ت و بوختان له‌ لایه‌ن ده‌فته‌ری‌ سیاسی‌ به‌ره‌وڕوو بووه‌وه‌. ئه‌و هاوڕێیانه‌ وه‌ها په‌رده‌یان دڕی‌ كه‌ له‌ راگه‌یاندنه‌ ره‌سمیه‌كاندا به‌شێك له‌ كۆمه‌ڵه‌یان به‌ وه‌ها ده‌سته‌واژه‌ و تۆمه‌تگه‌لێك برده‌ ژێر پرسیاره‌وه‌ كه‌ ساڵانێكه‌ ته‌نانه‌ت له‌ نێو حیزبه‌ ركابه‌ره‌كانیشدا، ئه‌م چه‌شنه‌ ئه‌ده‌بیاته‌ وه‌لانراوه‌ و ره‌خنه‌ی‌ لێگیراوه‌. له‌ بڕیارنامه‌ی‌ ناوخۆیی‌ پێشنیاركراودا، به‌ ئاشكرا ره‌خنه‌گرانی‌ ناوخۆیی‌ له‌ كۆمیته‌ی‌ ناوه‌ندی‌ و له‌ ته‌شكیلاتدا، به‌ دوژمنانی‌ بزووتنه‌وه‌ی‌ شۆڕشگێڕانه‌ی‌ كوردستان ناویان لێبرا. ئاماده‌ی‌ باس له‌سه‌ر روانگه‌ و سیاسه‌ت و ستراتیژیه‌كانی‌ كۆمه‌ڵه‌ و ئه‌و بزووتنه‌وه‌یه‌ نین كه‌ كۆمه‌ڵه‌ بۆ یه‌كێتیی‌ پته‌وی‌ خۆی‌ پێویستی‌ پێیه‌تی‌. له‌حاڵێكدا كه‌ كۆمه‌ڵه‌ تینووی‌ ریفۆرم و چاكسازیی‌ راسته‌قینه‌ و هه‌مه‌لایه‌نه‌یه‌، له‌ سمیناره‌ حیزبیه‌كاندا ده‌ستیان دایه‌ پڕوپاگه‌نده‌ی‌ یه‌كڕیزیی‌ له‌ جۆری‌ موجاهیدین و له‌و ماوه‌یه‌دا بۆ گه‌یشتن به‌ وه‌ها پێگه‌یه‌ك به‌ به‌رینی‌ كاریان كردووه‌. له‌حاڵێكدا كه‌ بۆ هه‌ر چاودێرێكی‌ ده‌ره‌وه‌ ئاشكرایه‌ كه‌ كۆمه‌ڵه‌ تووشی‌ قه‌یرانێكی‌ سیاسی‌ و ته‌شكیلاتیه‌، زۆرینه‌ی‌ كۆمیته‌ی‌ ناوه‌ندی‌ له‌جیاتی‌ هه‌وڵی‌ هاوبه‌ش بۆ دۆزینه‌وه‌ی‌ رێگای‌ چاره‌سه‌ر، به‌ حاشا كردن و ئاژاوه‌ نانه‌وه‌، ته‌نگژه‌ ناوخۆییه‌كانیان په‌ره‌ پێداوه‌ و له‌ مانگه‌كانی‌ رابردوودا به‌ دروست كردنی‌ كۆمه‌ڵێك قه‌یرانی‌ به‌ به‌رنامه‌ و سیستماتیك، كۆمه‌ڵه‌یان به‌ره‌و هه‌ڵدێر و كه‌له‌به‌ری‌ قووڵتر بردووه‌.
رێككه‌وتنه‌كانی‌ ئه‌م دواییانه‌ كه‌ به‌ به‌شداریی‌ دڵسۆزانه‌ی‌ دۆستانی‌ كۆمه‌ڵه‌ سه‌ری‌ گرت، له‌ لایه‌ن ده‌فته‌ری‌ سیاسیه‌وه‌ بێجگه‌ له‌ كات به‌سه‌ر بردن و جگه‌ له‌ هه‌وڵ‌ بۆ بێبه‌ش كردنی‌ قورسایی‌ و پێگه‌ی‌ كه‌مینه‌ی‌ كۆمیته‌ی‌ ناوه‌ندی‌ له‌ كۆنگره‌ و پێشگرتن به‌ حوزووری‌ سه‌ربه‌خۆیان له‌ كۆنگره‌ و له‌ ئه‌نجامدا جگه‌ له‌ تاكتێك له‌ پێناو مه‌به‌ست و پلانه‌كانیاندا، مانایه‌كی‌ دیكه‌ی‌ نه‌بوو. له‌حاڵێكدا كه‌ له‌ میانه‌ی‌ رێككه‌وتنه‌كاندا روو له‌ كۆمه‌ڵگای‌ كوردستان باسیان له‌ یه‌كڕیزیی‌ دووباره‌ ده‌كرد، له‌ناوخۆی‌ ته‌شكیلات به‌ گه‌رم‌وگوڕی‌ و هه‌ڵسووڕانی‌ زیاتره‌وه‌ سه‌رقاڵی‌ یه‌كخستنی‌ ریزه‌كانی‌ باڵی‌ خۆیان بوون. هه‌رچی‌ له‌و رێككه‌وتنانه‌ دوور ده‌كه‌وینه‌وه‌، روونتر ده‌بێته‌وه‌ كه‌ "تاكتیك"ی‌ رێككه‌وتن بۆ كات به‌ فیڕۆدان بوو تا سه‌رقاڵی‌ ئاماده‌كاریی‌ كۆنگره‌یه‌ك بن كه‌ كه‌مینه‌ی‌ كۆمیته‌ی‌ ناوه‌ندی‌ كه‌مترین ئاماده‌یی‌ ببێت و هه‌ر ئه‌م ده‌وره‌یه‌ له‌ رێككه‌وتنه‌كان نیشانیدا كه‌ ئه‌م هاوڕێیانه‌ بڕیاری‌ سڕینه‌وه‌ی‌ ره‌خنه‌گرانیان داوه‌ له‌ هه‌ر رێگایه‌كه‌وه‌.
به‌ ئاشكرا ئه‌م رێككه‌وتنانه‌یان تێكدا. له‌م رێككه‌وتنانه‌دا هاتووه‌ كه‌ هه‌ڵبژاردنی‌ نوێنه‌رانی‌ كۆنگره‌ به‌ ته‌واوی‌ دیموكراتیك و به‌ میكانیزمێك به‌ڕێوه‌ ده‌چێت كه‌ جێی‌ ره‌زامه‌ندی‌ و قه‌بووڵی‌ هه‌ر دوو لا بێت بۆ ئه‌وه‌ی‌ هه‌موان بتوانن به‌ ته‌واوی‌ نوێنه‌رایه‌تی‌ بكرێن. هه‌روه‌ها بڕیار بوو كه‌ به‌ هاوبه‌شی‌ زنجیره‌یه‌ك كۆبوونه‌وه‌ له‌ ناو هه‌موو به‌شه‌كانی‌ ته‌شكیلاتدا ساز بده‌ن و به‌مجۆره‌ فه‌زای‌ ته‌شكیلات ئاسایی‌ بكرێته‌وه‌. هیچكام له‌م خاڵانه‌ به‌ كرده‌وه‌ نه‌كران.
هاوڕێیانی‌ ده‌فته‌ری‌ سیاسی‌ به‌رنامه‌یه‌كیان بۆ كۆنگره‌ چنیوه‌ كه‌ به‌ ئاشكرا نه‌خشه‌ و پلانه‌كانیان روون ده‌كاته‌وه‌. كاری‌ كۆمیسیۆنی‌ ئاماده‌كاری‌ كۆنگره‌یان هه‌ڵوه‌شانده‌وه‌ كه‌ كه‌ له‌ هه‌ر دوو لا پێكهاتبوو و هه‌ڵبژێردراوی‌ پلۆنۆمی‌ كۆمیته‌ی‌ ناوه‌ندی‌ بوو، و هیچ مه‌یلێكیان بۆ حوزووری‌ هاوبه‌ش له‌ كۆنگره‌ و ئاماده‌كاریی‌ هاوبه‌شی‌ سیاسی‌ بۆ كۆنگره‌ له‌ خۆیان نیشان نه‌دا. ئاییننامه‌ی‌ هه‌ڵبژاردنی‌ نوێنه‌رانی‌ كۆنگره‌یان په‌سند نه‌كرد. هه‌موو چاودێری‌ ناوه‌نده‌كان و به‌رپرسانی‌ هه‌ڵبژاردن، له‌ باڵی‌ زۆرینه‌ی‌ كۆمیته‌ی‌ ناوه‌ندی‌ دیاری‌ كران.
گرینگتر له‌وانه‌ ئه‌وه‌یه‌ كه‌ خواستی‌ به‌رده‌وامی‌ به‌شی‌ به‌رچاوی‌ كادر و ئه‌ندامان و به‌تایبه‌ت به‌شی‌ هه‌ره‌ زۆری‌ كادره‌كانی‌ ته‌شكیلاتی‌ نهێنی‌ بۆ وه‌دوا خستنی‌ كۆنگره‌، به‌ كه‌مته‌رخه‌میه‌وه‌ بێ‌وه‌ڵام مایه‌وه‌. زیاتر له‌ 150 كه‌س له‌ كادر و ئه‌ندامانی‌ كۆمه‌ڵه‌ له‌ ته‌شكیلاتی‌ ده‌ره‌وه‌ و له‌ ئۆردووگاكان له‌ نامه‌یه‌كدا به‌ ئاماژه‌ بۆ پێویستیی‌ پاراستنی‌ یه‌كڕیزیی‌ كۆمه‌ڵه‌، خوازیاری‌ وه‌دواخستنی‌ كۆنگره‌ و راگرتنی‌ ئه‌و هه‌ڵبژاردنه‌ بوون كه‌ به‌ ته‌واوی‌ یه‌كلایه‌نه‌ و نادیموكراتیك و دژی‌ یه‌كڕیزیه‌.
ده‌فته‌ری‌ سیاسی‌ به‌ ئه‌ندامگیریی‌ یه‌كلایه‌نه‌ و ته‌نانه‌ت له‌ ده‌ره‌وه‌ی‌ كاری‌ كۆمیسیۆنی‌ ئه‌ندامیه‌ت و به‌و شێوازانه‌، سه‌ره‌نجام چووه‌ پێی‌ به‌ڕێوه‌بردنی‌ هه‌ڵبژاردنی‌ نوێنه‌رانی‌ كۆنگره‌. هه‌ڵبژاردنێك كه‌ به‌ توندی‌ كۆنترۆڵ‌ كراو، جیناحی‌، نادیموكراتیك و به‌ بێ‌ له‌به‌رچاو گرتنی‌ به‌رژه‌وه‌نده‌كانی‌ كۆمه‌ڵ و داهاتووه‌كه‌ی‌، پلانی‌ بۆ دارێژرا. سه‌ره‌ڕای‌ ئه‌وه‌ی‌ ده‌فته‌ری‌ سیاسی‌ به‌ باشی‌ ئاگادار بوو كه‌ به‌شێكی‌ زۆر له‌ هاوڕێیان و ئه‌ندامانی‌ كۆمه‌ڵه‌ له‌م هه‌ڵبژاردنه‌ نارازین و به‌شداریی‌ تێدا ناكه‌ن، له‌گه‌ڵ‌ ئه‌وه‌ش به‌ كه‌مته‌رخه‌می‌ و خۆ لادان له‌ چاره‌نووسی‌ كۆمه‌ڵه‌ و بێ‌خه‌م له‌ دروست بوونی‌ كه‌له‌به‌رێكی‌ قووڵتر له‌ ریزه‌كانی‌ كۆمه‌ڵه‌دا و كادره‌ 30 ساڵه‌كان و بزووتنه‌وه‌ی‌ به‌رینتری‌ كۆمه‌ڵه‌، ئه‌م ره‌وته‌ی‌ به‌ره‌و دۆخێكی‌ ناڵه‌بارتر بردووه‌.
به‌ڵام هه‌ڵبژاردنه‌كان له‌گه‌ڵ‌ بایكۆت و به‌شداری‌نه‌كردنی‌ به‌رینی‌ كادر و ئه‌ندامانی‌ كۆمه‌ڵه‌ به‌ره‌وڕوو بوو. زیاتر له‌ 150 كه‌س له‌ ئه‌ندامانی‌ كۆمه‌ڵه‌ له‌ ته‌شكیلاته‌كانی‌ ده‌ره‌وه‌ی‌ وڵات و له‌ كوردستان به‌شداریان له‌ هه‌ڵبژاردنی‌ نوێنه‌رانی‌ كۆنگره‌دا نه‌كرد. به‌پێی‌ راپۆرته‌كانی‌ ده‌ره‌وه‌ی‌ وڵات، زیاتر له‌ 50%ی‌ ئه‌ندامان یان نه‌چوونه‌ته‌ شوێنی‌ هه‌ڵبژاردن و یان به‌ نیشانه‌ی‌ ناره‌زایی‌، ده‌نگی‌ سپی‌یان داوه‌. له‌م به‌ناو هه‌ڵبژاردنه‌دا كه‌ ته‌نیا هاوڕێیانی‌ لایه‌نی‌ باڵی‌ زۆرینه‌ی‌ كۆمیته‌ی‌ ناوه‌ندی‌ تێیدا به‌شدار بوون، له‌ چه‌ندین حه‌وزه‌ ته‌نانه‌ت سه‌ره‌تاییترین پرۆسه‌ی‌ ئاسایی‌ هه‌ڵبژاردنه‌كانیش ره‌چاو نه‌كراوه‌. له‌ وڵاتێك 2 رۆژ دوای‌ هه‌موو هه‌ڵبژاردنه‌كان، ده‌نگیان له‌ هاوڕێیانێك وه‌رگرتووه‌. له‌ وڵاتێكی‌ دیكه‌ بۆ ته‌نیا كاندیدێك ده‌نگیان كۆكردووه‌ته‌وه‌ و له‌ چه‌ند حه‌وزه‌ی‌ وڵاتێك هه‌ر ده‌نگدان نه‌بووه‌ و زۆرتر به‌ ته‌له‌فۆن و ده‌ستێوه‌ردانی‌ ئاشكرا و فشار هێنان بۆ ئه‌ندامان به‌ڕێوه‌ چووه‌. خاڵی‌ دیكه‌ی‌ له‌م چه‌شنه‌ش له‌م هه‌ڵبژاردنانه‌دا روویداوه‌ كه‌ ته‌نانه‌ت له‌ نادیموكراتیكترین حیزبه‌كاندا نابینرێ‌. فشار له‌ باڵاترین ئۆتۆریته‌ حیزبیه‌كانه‌وه‌ بۆ سه‌ر ئه‌ندامانی‌ ساده‌ و تازه‌ ئه‌ندام و هاوكات له‌گه‌ڵ‌ هه‌ڕه‌شه‌، چه‌ند نموونه‌یه‌ك له‌وانه‌یه‌.
راستیه‌كه‌ی‌ ئه‌وه‌یه‌ كه‌ ئه‌وه‌ی‌ ده‌فته‌ری‌ سیاسی‌ سووره‌ له‌سه‌ری‌، كۆنگره‌ی‌ هه‌موو كۆمه‌ڵه‌ نیه‌. كۆبوونه‌وه‌ی‌ باڵێك له‌ كۆمه‌ڵه‌یه‌ و زۆربه‌ی‌ نوێنه‌ره‌كانی‌، نوێنه‌ر و هه‌ڵسووڕاوانی‌ باڵێكن. هه‌موو پرۆسه‌ی‌ ئاماده‌كاریی‌ كۆنگره‌ به‌ ته‌واوی‌ یه‌كلایه‌نه‌ رێكخرا و هه‌ر بۆیه‌ له‌ لایه‌ن به‌شێكی‌ به‌رچاوی‌ ئه‌ندامانه‌وه‌ ته‌حریم و بایكۆت كرا. جیا له‌و شتانه‌ی‌ سه‌ره‌وه‌، هۆیه‌كانی‌ دیكه‌ی‌ ئێمه‌ بۆ به‌شداری‌ نه‌كردن له‌ وه‌ها كۆنگره‌یه‌كدا به‌مشێوه‌یه‌ی‌ خواره‌وه‌یه‌:
1_ هیچ چه‌شنه‌ ئاماده‌كاریه‌كی‌ سیاسی‌ و ته‌شكیلاتی‌ بۆ ئه‌م كۆنگره‌یه‌ نه‌كراوه‌. كاری‌ كۆمیسیۆنی‌ ئاماده‌كاری‌ كۆنگره‌، هه‌ڵبژێردراوی‌ پلۆنۆمی‌ یه‌كه‌م، له‌ لایه‌ن ده‌فته‌ری‌ سیاسی‌ (بۆ به‌ بنبه‌ست گه‌یاندنی‌ هه‌ر چه‌شنه‌ كاری‌ هاوبه‌ش) هه‌ڵوه‌شایه‌وه‌.
2_ كۆنگره‌ی‌ 12 له‌ لایه‌ن نوێنه‌رانی‌ كۆنگره‌ی‌ 11 بانگه‌وازی‌ بۆ درا. به‌ڵام زیاتر له‌ 60%ی‌ نوێنه‌رانی‌ كۆنگره‌ی‌ 11 دژی‌ به‌ڕێوه‌چوونی‌ هه‌ڵبژاردن و كۆنگره‌ن و یان له‌ هه‌ڵبژاردنه‌كاندا به‌شداریان نه‌كردووه‌.
3_ فه‌زای‌ ناكۆكیه‌ ناوخۆییه‌كان وه‌ها گرژه‌ كه‌ باسی‌ سیاسی‌ و به‌ڵگاندن بۆ گه‌یشتن به‌ ئامانجێكی‌ سیاسی‌ تاكتیكی‌ و درێژماوه‌ی‌ به‌ ته‌واوی‌ خستۆته‌ ژێر كاریگه‌ریی‌ خۆیه‌وه‌. له‌ هه‌ل‌ومه‌رجێكدا كه‌ به‌شێك و نیوه‌ی‌ كۆمه‌ڵه‌ به‌شداری‌ ناكات، باشترین و گونجاوترین كار، وه‌دوا خستنی‌ كۆنگره‌یه‌ هه‌تا به‌ پێكهێنانی‌ فه‌زایه‌كی‌ پڕ له‌ باس و دیالۆگ، به‌ستێنه‌كانی‌ كۆنگره‌یه‌كی‌ ئوسوولی‌ و یه‌كڕیزی‌ و هاوپشتیه‌كی‌ به‌رده‌وام له‌ كۆمه‌ڵه‌ ئاماده‌ بكه‌ن.
4_ ئاییننامه‌ و ئاماده‌كاریه‌كانی‌ نادیموكراتیك بوو. له‌ هه‌ندێك له‌ كۆبوونه‌وه‌كانی‌ هه‌ڵبژاردنه‌كاندا سه‌ره‌تاییترین شێوازه‌كانی‌ باو بۆ ده‌نگدان له‌به‌رچاو نه‌گیراوه‌.
5_ له‌حاڵێكدا كه‌ 40%ی‌ ئه‌ندامانی‌ ده‌ره‌وه‌ و ناو ئۆردووگاكان له‌ هه‌ڵبژاردنه‌كاندا به‌شداریان نه‌كردووه‌، به‌شی‌ ئه‌وانیش به‌ قازانجی‌ باڵی‌ زۆرینه‌ی‌ كۆمیته‌ی‌ ناوه‌ندی‌ داگیر كراوه‌. زۆربه‌ی‌ ئه‌ندامان و ته‌شكیلاتی‌ ناوه‌وه‌ی‌ شاره‌كان له‌گه‌ڵ‌ ئه‌مجۆره‌ به‌ڕێوه‌بردنه‌ی‌ كۆنگره‌ دژایه‌تیان هه‌یه‌.
6_ سه‌ره‌نجام ئه‌وه‌ی‌ كه‌ ئه‌م كۆنگره‌یه‌ له‌گه‌ڵ‌ بایكۆتێكی‌ به‌رین و بێ‌وێنه‌ به‌ره‌وڕووه‌ كه‌ نیشان ده‌دات پێداگری‌ له‌سه‌ر به‌ڕێوه‌بردنی‌، كۆمه‌ڵه‌ به‌ره‌و لێكترازان و كێشه‌ی‌ ناوخۆیی‌ توندتر پاڵ‌ پێوه‌ ده‌نێت.
بۆ ده‌رچوون له‌م بنبه‌سته‌ پێشنیاری‌ ئێمه‌ ئه‌وه‌ بووه‌ كه‌: یه‌كه‌م ئه‌وه‌ی‌ كه‌ به‌ هه‌مان رێژه‌ كه‌ نوێنه‌رانی‌ ئێستا له‌ ناو ئه‌و ئه‌ندامانه‌ی‌ به‌شداریان كردووه‌ و هه‌ڵبژێردراون، نوێنه‌ر له‌و ئه‌ندامانه‌ی‌ وا به‌شداریان نه‌كردووه‌ هه‌ڵبژێرن. دووهه‌م ئه‌وه‌ی‌ كه‌ به‌ رێككه‌وتن و ره‌زامه‌ندی‌ هه‌ر دوو لا، ژماره‌ و چۆنیه‌تیی‌ به‌شداریی‌ هاوڕێیانی‌ ناو شاره‌كانی‌ كوردستان دیاری‌ بكرێت و نوێنه‌ره‌كانیان هه‌ڵبژێردرێن.
له‌ روانگه‌ی‌ ئێمه‌وه‌ ئه‌مه‌ لانیكه‌مێكه‌ كه‌ سه‌ره‌ڕای‌ هه‌موو كه‌م‌وكوڕیه‌كانی‌ ئاماده‌كاریی‌ كۆنگره‌، به‌شداری‌ كردنمان له‌ كۆنگره‌ مسۆگه‌ر ده‌كات.

كه‌مینه‌ی‌ كۆمیته‌ی‌ ناوه‌ندیی‌ كۆمه‌ڵه‌ی‌ شۆڕشگێڕی‌ زه‌حمه‌تكێشانی‌ كوردستانی‌ ئێران
14ی‌ گه‌لاوێژی‌ 1386
2007-08-05
تێبینی‌: ئه‌م نووسراوه‌یه‌ پێش "كۆنگره‌" به‌شێوه‌ی‌ ناوخۆیی‌ له‌ ناو ئه‌نداماندا بڵاو كرایه‌وه‌. ئێستا به‌ له‌به‌رچاو گرتنی‌ باسه‌كان سه‌باره‌ت به‌م "كۆنگره‌"یه‌ به‌ پێویستمان زانی‌ بیخه‌ینه‌ به‌ر ده‌ستی‌ هه‌موان.